सरकारले निःशुल्क भिसा र टिकटको निर्णय कार्यान्वयन गर्नुअघि श्रम सम्झौता आवश्यक भएको मलेसियाको क्वालालम्पुरमा आयोजिक एक कार्यक्रमका वक्ताहरुले बताएका छन् ।
नेपाली कांग्रेस जनसम्पर्क समिति मलेसियाले आइतबार क्वालालम्पुरमा आयोजना गरेको ‘सून्य लागत र मलेसियामा रहेका नेपालीहरुको धारणा’ विषयक अन्तरक्रिया कार्यक्रममा वोल्ने अधिकांश वक्ताहरुले मलेसियामा फ्रि भिषा र फ्रि टिकट लागू गर्नु भन्दा अगाडि दुई देशबीच श्रम संझौता हुनुपर्नेमा जोड दिए ।
अन्तरक्रियामा भाग लिँदै मलेसियाका लागि नेपाली राजदुत डा.निरन्जनमानसिंह वस्न्यातले सरकारले ल्याएको नीति एकदमै राम्रो भएकाले सवैले यसलाई राम्ररी कार्यान्यन गर्नुपर्नेमा जोड दिए । दुई देशबीच श्रम संझौताको लागि पहल भइरहेको वताउदै वस्न्यातले भने – ‘वार्ता जारी छ मुख्य मुख्य कुराहरु नमिलेको कारणले केहि ढिला भएको हो ।’
मलेसियामा धेरै नेपालीहरुले दुःख पाएको वताउदै मलेसियामा रहेका संघ संस्थाहरुले ती पीडाका परेका नेपालीहरुको लागि सहयोगीको भूमिका खेल्नुपर्नेमा जोड दिए । कोही पनि पैसाको अभावमा नेपाल फर्कन नसकिरहेको अवस्था भएमा दूतावाससम्म ल्याइदिएमा दूतावासले टिकट काटेर नेपाल पठाईदिने उनले बताए ।
दुतावासका श्रम सहचरी वुद्धिनाथ भटटराईले फ्रि भिषा र फ्रि टिकट कार्यान्वयनको शुरुवात भइसकेको र दुई महिनाको अवधिमा सेक्युरिटी गार्डसहित एक सय १४ कम्पनीहरुवाट चार हजारको माग आईसकेको उल्लेख गरे ।
नेपाली काग्रेस जनसम्पर्क समितिका सभापति चोलाकान्त पंगेनीको सभापतित्वमा भएको अन्तरक्रियामा प्रवासी नेपाली मन्चका अध्यक्ष राजेन्द्र भण्डारी, जन प्रगतिशील नेपाली मोर्चाका लिला आचार्य, प्रगतिशील प्रवासी श्रमिक मन्चका अध्यक्ष प्रेम पाण्डे, एनआरएन मलेसियाका अध्यक्ष महेन्द्रजंग शाह, आईसीसी सदस्य, खगेन्द्रप्रसाद न्यौपाने, एनआरएनका निवर्तमान अध्यक्ष शंकरवहादुर पौडेल, एनआरएनका संरक्षक विश्व राई, नेपाली ब्यापारी समाजका अध्यक्ष इन्द्र लिम्वु, ब्यवसायी हरि भट्टराई, पुष्पराज चौलागाई, रमेश तिवारी, दीपक वोगटी, प्राध्यापक धिरेन्द्रप्रसाद कोइराला लगायतले आ-आफना धारणा राखेका थिए ।
जेल र क्याम्पमा रहेका नेपालीलाई घर फर्काउन रकम सहयोग
मलेसियाका जेल र डिटेन्सन क्याम्पमा रहेका नेपालीलाइ घर फर्काउन नेपाली जनसम्पर्क समिति मलेसियाले तीन हजार रिंगेट सहयोग गरेको छ ।
अन्तरकि्रया कार्यक्रममै अध्यक्ष पंगेनीले राजदुत डा. निरन्जनमान सिंह वस्न्यातलाई उक्त रकमको चेक हस्तान्तरण गरे । राजदुत वस्न्यातले विभिन्न कम्पनी र संस्थाले नेपाली दुतावासलाई टिकट सहयोग गर्दै गरेको र सो टिकटले नेपालीको उद्धार गर्न सकिएको जानकारी दिए ।
दुई सय ५२ नेपाली जेल र डिटेन्सन क्याम्पमा रहेको र उनीहरुको उद्धारमा दुतावास क्रियाशील रहेको वस्न्यातले जानकारी दिए ।